ათასობით ადამიანისგან შემდგარი ბრბო შეიკრიბა, რათა სიტყვიერი შეურაცხყოფითა და ქვების სროლით გაეცილებინა მშვიდობიან მსვლელობაში მონაწილე 200 ადამიანი, რომელსაც პოლიცია იცავდა. აქტივისტების თქმით, პოლიცია არ იყო სათანადოდ მომზადებული პრაიდის დასაცავად.
ინციდენტის დროს 12 ადამიანი, მათ შორის რამდენიმე ჟურნალისტი დაშავდა. საპროტესტო აქციის მონაწილეებმა პრაიდის მონაწილეებისკენ ცრემლსადენი გაზიც გაუშვეს. ამის შემდეგ პოლიციამ პრაიდის მონაწილეების ევაკუირება მოახდინა.
რადიო თავისუფალი ევროპის განცხადებით, ხორვატიის პრეზიდენტმა ივო იოსიპოვიჩმა და პრემიერ მინისტრმა იადრანკა კოსორმა დაგმეს ძალადობა. იოსიპოვიჩის განცხადებით, სპლიტში მომხდარი ინციდენტი არ არის ხორვატიის ”ნამდვილი სახე” და ეს ინციდენტები ცხადყოფს, რომ საზოგადოებაში ჯერ კიდევ არსებობს ”არაევროპული” ნაწილი.
შინაგან საქმეთა ყოფილმა მინისტრმა, სიმე ლუცინმა განაცხადა, რომ პოლიციამ ყურადღება არ მიაქცია იმ გაფრთხილებებს, რომლებიც პრაიდამდე ერთი კვირით ადრე დაიწყო ანტი-გეი გრაფიტებისა და ინტერნეტში გავრცელებული ჰომოფობიური შეტყობინებების სახით. ლუცინის თქმით, რთული დასაჯერებელია, რომ 10,000 ადამიანი შემთხვევით შეიკრიბა და პოლიციას, რომელსაც საიდუმლო სამსახურებისა და სხვა მექანიზმების გამოყენება შეეძლო, ასეთი მცდარი გათვლა არ უნდა გაეკეთებინა.
პრაიდის ორგანიზატორები შინაგან საქმეთა მინისტრის ტომისლავ კარამარკოს გადადგომას მოითხოვენ. მათი განცხადებით, პოლიციამ საპროტესტო აქციის მონაწილეებს საშუალება მისცა, მსვლელობისათვის განკუთვნილი გზა დაევიწროვებინათ და მოუწოდა პრაიდის მონაწილეებს ამ გასასვლელში გაევლო მიუხედავად იმისა, რომ მათ ქვებს ესროდნენ.
