ეს დემონსტრაცია პირველია ავღანეთის ისტორიაში. მიუხედავად მისი მცირე მასშტაბებისა, საპროტესტო აქციის აზრი ცხადი და ავღანეთის უკიდურესად კონსერვატიული საზოგადოებისთვის სკანდალური იყო: ქალების შევიწროვება ქუჩაში არის თავდასხმა მათ ფუნდამენტურ უფლებაზე მამაკაცებთან ერთად იცხოვრონ საზოგადოებაში და მას წერტილი უნდა დაესვას.
ორი ადგილობრივი არასამთავრობო ორგანიზაციის წევრისა და რამდენიმე მამაკაცისგან შემდგარი მსვლელობა ქაბულის უნივერსიტეტის მიდამოებიდან დაიწყო ავღანეთის დამოუკიდებელი ადამიანის უფლებათა კომისიის შენობისკენ.
მოვაჭრეებითა და საყიდლებზე გამოსული ადამიანებით გადავსებულ ქუჩებში მიმავალი მონაწილეები ბროშურებს არიგებდნენ და ავღანელ თანამემამულეებს მოუწოდებდნენ აეღიარებინათ ქალების დამცირებისა და შევიწროვების ფაქტები და საკუთარი ცხოვრებიდან დაეწყოთ ცვლილებების განხორციელება ირგვლივ გამეფებული ძალადობის აღმოსაფხვრელად.
დემონსტრაციის მონაწილეებმა კარგად იცოდნენ ავღანეთის ისტორიაში მშვიდობიანი აქციების სისხლიან გარჩევებად გადაქცევის გამოცდილება და შიშობდნენ, რომ ძალადობის ინიციატორები არა მხოლოდ მამრობითი სქესის მოწინააღმდეგეები, არამედ მტრულად განწყობილი სამართალდამცავებიც იქნებოდნენ. თუმცა, პოლიცია მსვლელობის მონაწილეებს აქციის განმავლობაში ახლო მანძილზე მიყვებოდა და საპროტესტო აქციამ მშვიდობიანად და შეფერხებების გარეშე ჩაიარა.
ერთ-ერთი მონაწილის სიტყვებით, ეს ჯერ მხოლოდ დასაწყისია და ახალგაზრდების ამ ჯგუფს ბევრი სხვა რამ აქვს სამომავლოდ დაგეგმილი. მათი ინიციატივის მხარდამჭერები უკვე თავადაც სთავაზობენ აქტივისტებს ახალ იდეებს. ფეისბუკზე არსებულ „Young Women for Change“-ის გვერდზე აქციის ერთ-ერთმა მხარდამჭერმა მამაკაცმა, ახალგაზრდების წამოწყება მოიწონა და შესთავაზა მათ ფეისბუკზე შექმნან ახალი ჯფუფი - “Sex Offenders in Kabul”, რომელზეც გამოქვეყნდება ყველა იმ მამაკაცის სურათი და მანქანის ნომერი, რომელიც ქუჩაში მდგარ გოგოს მანქანას გაუჩერებს და მასთან ერთად წასვლას შესთავაზებს.
