2011 წლის 26 ოქტომბერს, ანკარის მეთხუთმეტე სისხლის სამართლის სასამართლოს პირველმა ინსტანციამ სამ ტრანსგენდერ აქტივისტსა და ადამიანის უფლებათა დამცველს - ნაზ გუდუმენს, ბუსე კილიჩკავას და სელაი ტუნჩს ხუთიდან თვრამეტ თვემდე ვადით თავისუფლების აღკვეთა მიუსაჯა. მათი გასამართლება მოხდა ისეთი ბრალდებების საფუძველზე, როგორიცაა პოლიციისთვის წინააღმდეგობის გაწევა და სამართალდამცავი ორგანოების წარმომადგენლებისთვის შეურაცხყოფის მიყენება. მაშინ, როცა ტუნჩისა და გუდუმენის განაჩენი შეჩერებულია, სასამართლოს გადაწყვეტილება კილიჩკავასთან დაკავშირებით ძალაში იქნება მოყვანილი სააპელაციო სასამართლოს მხრიდან ანალოგიური განაჩენის გამოტანის შემთხვევაში.
ზემოხსენებული საქმე სასამართლოს იმ მოვლენების შემდეგ გადაეცა, რომლებიც 2010 წლის 19 ივნისს განვითარდა, როდესაც ანკარის სევრანბაგლარი მაჰის რაიონში მანქანით მგზავრობისას, სამი ტრანსგენდერი ადამიანის უფლებათა აქტივისტი პოლიციამ გააჩერა და დააპატიმრა. ადამიანის უფლებათა დამცველი ჯგუფების ინფორმაციით, მსგავსი ქმედებები პოლიციის მხრიდან თვითნებურად ხორციელდება და ტრანსგენდერი ადამიანებისა და განსაკუთრებით ადამიანის უფლებათა აქტივისტების სისტემატიური ჩაგვრის ნაწილს წარმოადგენს.
თურქეთის მთავრობისადმი მიმართულ წერილში საერთაშორისო ორგანიზაციები ითხოვენ, რომ სამი აქტივისტისათვის წაყენებული ბრალდებები მოხსნილ იქნას და მოხდეს ტრანსგენდერი ადამიანების მიმართ პოლიციასა და სასამართლოებში დისკრიმინაციული მოპყრობის გამოძიება. ხელმომწერი ორგანიზაციები ასევე მოითხოვონ, რომ მოხდეს პოლიციის ოფიცრებისა და სასამართლოს მოხელეებისათვის შესაბამისი ტრენინგების ჩატარება, ტრანსფობიისა და ჰომოფობიის სამომავლო შემთხვევების თავიდან ასაცილებლად.
