პაპმა ბენედიქტ XVI–მ განაცხადა, რომ ერთსქესიანი ქორწინება ერთ–ერთი იმ საფრთხეთაგანია, რომელიც ტრადიციულ ოჯახსა და „თვით კაცობრიობის მომავალს“ ემუქრება.

ახალი წლის დასაწყისში პაპმა ვატიკანის დიპოლომატიური კორპუსისადმი გაკეთებულ მიმართვაში, საკმაოდ ძლიერი კომენტარები გააკეთა გეი ქორწინებასთან დაკავშირებით. მიმართვაში იგი საუბრობდა მსოფლიოს დღის წესრიგში მდგომ სხვადასხვა სოციალურ და ეკონომიკურ საკითხებზე.

პაპმა თითქმის 180 ქვეყნის წარმომადგენელ დიპლომატს განუცხადა, რომ ბავშვების განათლებას სწორი მიმართულება ჭირდება და პირველ რიგში ეს ეხება ოჯახს, რომელიც დაფუძნებულია მამაკაცისა და ქალის ქორწინებაზე.

„ეს არ არის უბრალო სოციალური პირობითობა, არამედ თითოეული საზოგადოების ფუნდამენტური უჯრედი. სახელმწიფო პოლიტიკა, რომელიც ოჯახს ძირს უთხრის, ადამიანურ ღირსებასა და თვით კაცობრიობის მომავალს უქმნის საფრთხეს,“ – განაცხადა მან.

ვატიკანი და კათოლიკური ეკლესიის ოფიციალური პირები მსოფლიო მასშტაბით განუწყვეტლივ აპროტესტებენ ერთსქესიანი ქორწინების დაკანონებას ევროპასა და მსოფლიოს განვითარებულ ქვეყნებში.

ერთ–ერთი წამყვანი ამ საკითხში არის ამერიკის შეერთებულ შტატებში მოღვაწე ნიუ იორკის არქიეპისკოპოსი ტიმოთი დოლანი, რომელსაც პაპი კარდინალის წოდებას მიანიჭებს მომავალ თვეში.

დოლანი ერთსქესიან ქორწინებას მანამდეც ებრძოდა, სანამ იგი ლეგალური გახდებოდა ნიუ იორკის შტატში, გასულ ივნისს, ხოლო სექტემბერში მან პრეზიდენტ ბარაკ ობამას წერილი მისწერა და გააკრიტიკა მისი ადმინისტრაციის გადაწყვეტილება არ დაეჭირა მხარი ერთსქესიანი ქორწინების ფედერალური აკრძალვისათვის.

რომაული კათოლიკური ეკლესია, რომელსაც მსოფლიოს მასშტაბით 1.3 მილიარდი მიმდევარი ჰყავს, ასწავლის, რომ ჰომოსექსუალური მიდრეკილებები თავისთავად ცოდვას არ წარმოადგენს, ცოდვა მხოლოდ ჰომოსექსუალური აქტებია და რომ ბავშვები უნდა იზრდებოდნენ ტრადიციულ ოჯახში დედასა და მამასთან ერთად.

წყარო:http://www.reuters.com/article/2012/01/09/us-pope-gay-idUSTRE8081RM20120109