ABC News-ის მიერ გავრცელებული ინფორმაციის მიხედვით პრეზიდენტმა ობამამ განაცხადა: „ როდესაც მე ვფიქრობ ჩემი ადმინისტრაციის იმ წევრებზე, რომლებიც ერთგულ, მონოგამურ ერთსქესიან ურთიერთობებში არიან და ბავშვებსაც კი ზრდიან პარტნიორებთან ერთად, როდესაც ვფიქრობ იმ ჯარისკაცებზე, მფრინავებსა და მეზღვაურებზე, რომლებიც ჩემი სახელით იბრძვიან და მაინც შებოჭილები არიან იმიტომ, რომ არ შეუძლიათ საყვარელ ადამიანებთან იქორწინონ, იმ დასკვნამდე მივდივარ, რომ ჩემთვის პირადად მნიშვნელოვანია ეს ნაბიჯი გადავდგა და განვაცხადო, რომ ჩემი აზრით ერთსქესიან წყვილებს ქორწინების უფლება უნდა ჰქონდეთ.“
ბოლო პერიოდის განმავლობაში, პრეზიდენტი ობამა საკითხთან დაკავშირებით მზარდ ზეწოლას განიცდიდა, რადგან როგორც ვიცე პრეზიდენტმა ჯო ბიდენმა, ასევე განათლების სახელმწიფო მდივანმა არნე დანკანმა ღიად დაუჭირეს მხარი ერთსქესიან ქორწინებას გასულ კვირას.
რამდენიმე ხნის წინ, პრეზიდენტი ობამა გენდერული ნიშნით ნეიტრალური ქორწინების საწინააღმდეგოდ ქრისტიანულ რელიგიას ასახელებდა, თუმცა დღემდე მხარს უჭერდა ერთსქესიან სამოქალაქო პარტნიორობას. ქორწინებასთან დაკავშირებული მისი განცხადება პრეზიდენტის შეხედულებებში მკაფიო ცვლილებას ასახავს, და იმითაა განსაკუთრებული, რომ ჩრდილოეთ კაროლინას მემორანდუმიდან მეორე დღეს იქნა გაკეთებული. ზემოხსენებულ მემორანდუმში ჩრდილოეთ კაროლინას მაცხოვრებლები ყოველგვარი ერთსქესიანი სამოქალაქო კავშირების წინააღმდეგ გამოვიდნენ.
