პაკისტანის პოლიციამ 14 წლის გოგონასთვის ცეცხლსასროლი ჭრილობების მიყენებაში ეჭვმიტანილი რამდენიმე ადამიანი დააკავა. დაშავებული გოგონა სამიზნე იმის გამო გახდა, რომ ის გოგონებისათვის განათლების პრომოთირებას ახდენდა და ფუნდამენტალისტურ ისლამურ მიმდინარეობას აკრიტიკებდა.
მალალა იუსუფზაის, მის ორ თანაკლასელთან ერთად, ესროლეს, მაშინ, როდესაც ისინი გასულ სამშაბათს სკოლიდან სახლში მიდიოდნენ.
თალიბანმა მომხდარზე პასუხისმგებლობა აიღო და განაცხადა, რომ გოგონა ახორციელებდა ”დასავლური აზროვნების” პროპაგანდას, ამიტომ ოგანიზაციის ჩრდილოეთის ერთ-ერთმა ფილიალმა ორი თვის წინ გადაწყვიტა გოგონა მოეკლა, და თავდასხმა დაგეგმა მას შემდეგ, რაც მისმა ოჯახმა არაერთი გაფრთხილება უგულვებელყო.
მინგორას პოლიციის უფროსი აფზალ ხან აფრიდი აცხადებს, რომ პოლიციამ საქმესთან დაკავშირებით რამდენიმე ადამიანი დააკავა, თუმცა უარს ამბობს დეტალების გამჟღავნებაზე დაკავებულთა შესახებ, რადგან მას არ სურს მიმდინარე გამოძიებას შეუქმნას საფრთხე.
თალიბანის წარმომადგენელმა სირაჟუდდინ აჰმადმა განაცხადა, რომ იუსუფზაის ოჯახი სამჯერ იქნა გაფრთხილებული, უკანასკნელი გაფრთხილება კი გასულ კვირას მიიღო, სანამ გოგონას მოკვლის გადაწყვეტილება საბოლოო გახდებოდა. აჰმადის თქმით, თალიბანის ადგილობრივმა ლიდერმა მაულანა ფაზლულაჰმა შეარჩია სამი თავდამსხმელი, მათ შორის, ორი პროფესიონალი სნაიპერი, რომლებმაც ყურადღებით შეისწავლეს გოგონას მარშრუტი სახლიდან სკოლამდე.
სკოლა დაშავებული მოზარდი აქტივისტის მამას ეკუთვნის, რომელიც ძალიან ამაყობს შვილის მიღწევებით და თავადაც ძალიან აქტიურია გოგონებისათვის განათლების უფლების მინიჭების საკითხში. იუსუფზაი მინგორადან სასაზღვრო ქალაქ პეშვარში გადაიყვანეს, სადაც ექიმებმა კისრიდან ტყვია ამოუღეს. ხუთშაბათს ის გადაიყვანეს საავადმყოფოში რავალპინდიში, სადაც პაკისტანის ჯარი არის განლაგებული ისლამაბადის მახლობლად.
