ილგა-ევროპა მიესალმება ევროკავშირის მართლმსაჯულების სასამართლოს გადაწყვეტილებას, რომელიც ადასტურებს, რომ სამოქალაქო პარტნიორობაში მყოფ ერთი სქესის წყვილებს არ უნდა ეუბნებოდნენ უარს იმ სამუშაო შეღავათებზე, რომლებიც ქორწინებაში მყოფ წყვილებს აქვთ. ევროკავშირის მართლმსაჯულების სასამართლოს 2013 წლის 12 დეკემბერის გადაწყვეტილებით, დამსაქმებლებს არ აქვთ უფლება სამოქალაქო პარტნიორობაში მყოფ თანამშრომლებს უარი უთხრან იმ სამუშაო შეღავათებზე, რომლებითაც დაქორწინებული თანამშრომლები სარგებლობენ. ილგა-ევროპა მიესალმება ამ გადაწყვეტილებას, რომელიც ეხმიანება ევროკავშირის მართლმსაჯულების სასამართლოს უწინდელ დირექტივაში აღნიშნულ პრინციპებს, რომელთა მიხედვითაც ქორწინებაში მყოფი წყვილებისთვის არსებული დასაქმებასთან დაკავშირებული შეღავათებიდან სამოქალაქო პარტნიორობაში მყოფი ერთი სქესის წყვილების გამორიცხვა პირდაპირი დისკრიმინაციაა სექსუალური ორიენტაციის საფუძველზე. ეს გადაწყვეტილება იმითაც არის მნიშვნელოვანი, რომ მისი გამოყენება შეიძლება "საფრანგეთის სამოქალაქო სოლიდარობის პაქტის" (PACS) კონტექსტში, რომელიც საგრძნობლად ჩამოუვარდება ქორწინებას მასთან დაკავშირებული უფლებებისა და შეღავათების თვალსაზრისით. სასამართლომ დაადგინა, რომ ქვეყნებში, სადაც ერთი სქესის წყვილებს შორის ქორწინება არ არის კანონით დაშვებული (როგორც საფრანგეთში, ზემოხსენებული სარჩელის შეტანის დროისთვის), სამოქალაქო პარტნიორობაში მყოფი წყვილებისთვის მისაწვდომი უნდა იყოს ის სამუშაო შეღავათები, რომლებითაც სარგებლობენ დაქორწინებული წყვილები. ეს დადგენილება იმ ქვეყნებსაც ეხება, სადაც სამოქალაქო პარტნიორობის კანონი არ შეიძლება მიჩნეულ იქნას ქორწინების ექვივალენტად. საბჭოს მიერ 2000 წლის ნოემბერში მიღებული დირექტივა 2000/78/EC დასაქმების სფეროში თანასწორობის შესახებ. წყარო