უგანდას Imperial Resort Beach Hotel–ში შეკრებილი ლგბტ ვორკშოპის მონაწილეები, იძულებულები გახდნენ შენობა დაეცალათ და გაქცეულიყვნენ, როდესაც სიმონ ლოკოდო, ეთიკისა და ინტეგრაციის სახელმწიფო მინისტრი, კონფერენციაზე შეიჭრა და იგი ჩაშალა.
უგანდას მედია საშუალებები იუწყებიან, რომ ლოკოდომ მონაწილეებს მოსთხოვა იქაურობა დაეტოვებინათ და ორგანიზატორის ჟაკლინ კაშას დაპატიმრების ბრძანება გასცა. The Daily Monitor–ის განცხადებით კაშამ უსაფრთხოდ მოახერხა სასტუმროდან თავის დაღწევა.
უგანდელმა ლგბტ აქტივისტებმა სოციალურ ქსელ Facebook–ზე გაავრცელეს ინფორმაცია, რომლის თანახმადაც ვორკშოპის 30 მონაწილიდან არცერთს არაფერი დაშავებია და მათ საფრთხე არ ემუქრებათ.
საიდუმლოდ რჩება საიდან შეიტყო ლოკოდომ ამ კონფერენციის შესახებ, რომელიც უსაფრთხოების მიზნით საიდუმლოდ ტარდებოდა სასტუმროს ჩაკეტილ დარბაზში. ჰომოსექსუალობა უგანდაში კრიმინალიზებულია, თუმცა არა ჰომოსექსუალთა საჯარო თავშეყრა. ამჟამად, პარლამენტის წევრი დევიდ ბაჰატი ცდილობს დაარწმუნოს პარლამენტი მიიღოს ე.წ. „მოკალი გეები“ კანონპროექტი, რომელშიც ლგბტ ადამიანების საჯარო თავშეყრისათვის თავისუფლების აღკვეთაა გათვალისწინებული. შეგახსენებთ, რომ კანონპროექტი, რომელიც „რეციდივული დანაშაულისთვის“ სასიკვდილო განაჩენს მოიაზრებს, გასულ კვირას ხელახლა წარადგინეს უგანდას პარლამენტში.
„ეს კონფერენცია იმიტომ დავხურე, რომ კანონს ეწინააღმდეგება. უგანდაში ჰომოსექსუალობას არ ვემხრობით, ამიტომ სახლებში დაბრუნდით,“ განუცხადა ლოკოდომ The Daily Monitor–ს.
