საქინე მოჰამადი აშთიანიმ ჟურნალისტს განუცხადა, რომ ის საკუთარი ქმრის მკვლელობაში ერთ-ერთი თანამონაწილე იყო და რომ მას ”უკანონო სქესობრივი კავშირი” ჰქონდა მეუღლის ბიძაშვილთან. მისმა ადვოკატმა Guardian -ს უთხრა, რომ მისი კლიენტი 43 წლის ორი შვილის დედა, ინტერვიუს ჩაწერამდე ორი დღის განმავლობაში აწამეს თაბრიზის ციხეში, სადაც ის ბოლო 4 წლის განმავლობაში ჰყავთ დამწყვდეული.

ადვოკატმა ასევე გამოთქვა შიში იმის თაობაზე, რომ ირანელი სამართალდამცავები ახლა სასწრაფოდ მოიყვანენ სასიკვდილო განაჩენს სისრულეში. შეგახსენებთ, რომ აშთიანის საქმით გამოწვეული საერთაშორისო გამოხმაურების შემდეგ, ჩაქოლვის განაჩენი ჩამოხრჩობით შეცვალეს. აშთიანის პირვანდელი ბრალდება მეუღლის ღალატი იყო, თუმცა მოგვიანებით ირანელმა მოხელეებმა განაცხადეს, რომ ქალი აგრეთვე საკუთარი ქმრის მკვლელობაში მიუძღოდა ბრალი და ამიტომ უნდა ჩაექოლათ.

ინტერვიუ გადასცეს გადაცემაში, რომელსაც 20:30 ჰქვია, ერთი დღით ადრე კი შეერთებული შტატების სახელმწიფო მდივანმა ჰილარი კლინტონმა მოუწოდა თეირანს პატივი სცეს ხელშეკრულების პირობებით გათვალისწინებულ მოქალაქეთა უფლებების დაცვას და შეაჩეროს სიკვდილით დასჯა.

ეს არაა პირველი შემთხვევა, როცა ირანი უდანაშაულო მსხვერპლს სატელევიზიო გადაცემაში აძალებს დანაშაული აღიაროს, რათა განაჩენი სასწრაფოდ იქნას სისრულეში მოყვანილი. ეს ძალიან ხშირად ხდებოდა ისლამური რევოლუციის პირველ ათწლეულში.

ირანის სახელმწიფო არხის ინფორმაციით საერთაშორისო ყურადღება, რომელიც მოჰამადი აშთიანის საქმემ მიიპყრო ”დასავლური პროპაგანდაა”, რომელიც მიზნად ისახავს დააძალოს ირანის მთავრობას სამი ამერიკელი მოგზაურის გათავისუფლება, რომლებიც ირანში გასული წლიდან არიან დაკავებულები.

წყარო:

http://www.guardian.co.uk/world/2010/aug/12/sakineh-mohammadi-ashtiani-confesses-murder-iran