ათასობით ადამიანი - ზოგი ჯინსებში, ზოგიც უპრო გამომწვევად ჩაცმული - მონაწილეობას იღებს მსვლელობებში, რომლებსაც ” SlutWalks" (”ბოზების მსვლელობა”) დაერქვა.
ორგანიზატორების თქმით, მიზანი არის იმ კულტურის გამოვლენა და ხაზგასმა, რომელშიც ბრალი არა მოძალადეს არამედ ძალადობის მსხვერპლს ედება ხოლმე.
შაბათს, ბოსტონში, მსვლელობას 2000 ადამიანი შეუერთდა.
ტორონტოს ოსგუდ ჰოლის იურიდიულ ინსტიტუტში სტუდენტებთან ჯანმრთელობასა და უსაფრთხოებაზე საუბრისას, პოლიციის ოფიცერმა მაიკლ სანგუინეტიმ რამდენიმე მიუღებელი კომენტარი გააკეთა:
” მე გამაფრთხილეს თქვენთვის ეს არ მეთქვა, მაგრამ მაინც ვიტყვი, ქალები უნდა მოერიდონ ბოზებივით ჩაცმას, თუკი არ სურთ რომ ძალადობის მსხვერპლად იქცნენ.”
სანგუინეტიმ შემდგომში ბოდიში მოიხადა ნათქვამის გამო და ტორონტოს პოლიციამ მას საყვედური გამოუცხადა, თუმცა პოლიციიდან არ გაურიცხავთ.
გასულ თვეს, ტორონტოში მოწყობილ მსვლელობაში 3000 ადამიანმა მიიღო მონაწილეობა. SlutWalk Toronto-ს ვებგვერდი იუწყება, რომ მოძრაობის ერთ-ერთი მიზანია სიტყვა”ბოზის” რეაბილიტაცია მოახდინოს.
”ის, რომ საკუთარ სექსუალურ ცხოვრებას თავად განვაგებთ იმას არ ნიშნავს, რომ ძალადობის პერსპექტივისადმი ღია უნდა ვიყოთ იმის და მიუხედავად სექსუალური აქტი ჩვენთვის სიამოვნებაა თუ სამსახური,” – ნათქვამია ვებგვერდზე.
მსგავსი მსვლელობები ახლა იმართება დალასში, ჩრდილოეთ კაროლინაში მდებარე აშვილში და კანადის დედაქალაქ ოტავაში. ღონისძიება ასევე იგეგმება სიეტლში, ჩიკაგოში, ფილადელფიაში, რენოსა და ოსტინში.
მსვლელობები, როგორც წესი, მთავრდება ვორკშოპებითა და საუბრებით სექსუალური ძალადობის შეჩერების თაობაზე და სამართალდამცავი ორგანოებისადმი მოწოდებებით, რომ სექსუალური ძალადობის მსხვერპლების დადანაშაულება შეწყვიტონ.
