31 წლის იგნასიო ესტრადამ და 37 წლის ვენდი ირიეპამ, საკუთარი კავშირი სამოქალაქო ქორწინებით დააკანონეს და ქორწილის ცერემონია ფიდელ კასტროს 85-ე დაბადების დღეს დაამთხვიეს. როგორც წყვილმა განაცხადა, მათ ყოფილ ლიდერს საიუბილეო საჩუქარი გაუკეთეს.
ტექნიკურად ეს ერთსქესიანი ქორწინება არ გახლდათ (რაც კუბაში კანონსაწინააღმდეგოა), ვინაიდან ირიეპა ლეგალურად ქალია. იგი პირველია, ვინც კუბაში სახელმწიფოს დაფინანსებით გაიარა სქესის ქირურგიული კორექცია. მიუხედავად ამისა, წყვილის ქორწილი გეი უფლებათა მანიფესტაციას ემსახურებოდა, განსაკუთრებით იმიტომ, რომ 1960-იან წლებში ჰომოსექსუალებს, როგორც ანტირევოლუციურ პირებს, გამოსასწორებელ ბანაკებში აგზავნიდნენ. ეს ინიციატივა 1959 წლის რევოლუციას მოჰყვა და გასულ წელს ფიდელ კასტრომ იგი შეცდომად აღიარა და ბოდიშიც მოიხადა.
ცერემონიას კუბის ყველაზე ცნობილი დისიდენტები და შეერთებული შტატების დიპლომატები ესწრებოდნენ.
ესტრადამ განაცხადა, რომ ეს პირველი ქორწინებაა გეი მამაკაცსა და ტრანსსექსუალ ქალს შორის და რომ წყვილი ხმამაღლა აღნიშნავს ამ მოვლენას, როგორც კუბაში გეი უფლებების სფეროში წინ გადადგმულ ნაბიჯს.
წყვილს, რომელიც სამი თვის წინ შეხვდა ერთმანეთს, ცერემონიაზე მხარდამჭერები, რეპორტიორები და ცნობისმოყვარე კუბელები ტაშით შეეგებნენ.
