პოლონეთში მიმდინარე საპარლამენტო არჩევნებში ახალმა ანტიკლერიკალურმა პარტიამ მესამე ადგილი მოიპოვა. არჩევნების ესოდენ მოულოდნელი შედეგები ერთგვარი ვარაუდის საშუალებას იძლევა, რომ პოლონეთის ახალი პარლამენტის ერთ–ერთი წევრი, ტრანსგენდერი ქალი, 57 წლის ანნა გროდზკა გახდება.
ბიოლოგიურად მამაკაცად დაბადებულმა, 57 წლის გროდზკამ სქესის შეცვლის ოპერაცია გასულ წელს დაასრულა ორგანიზაციის „Trans-Fuzja“–ს ხელშეწყობით.
ანნა გროდზკა იანუშ პალიკოტის მოძრაობის მირ წარმოდგენილ კანდიდატთა სიის სათავეში მოექცა და თავისი პოზიციით აღფრთოვანებულია, მით უფრო, რომ ეს ყველაფერი რომის პაპის იოანე პავლე მეორეს მშობლიურ, მკაცრი კათოლიკური ტრადიციით გამორჩეულ ქალაქ კრაკოვში ხდება.
ქალბატონი გროდზკას განცხადებით, კრაკოვში არჩევნებში გამარჯვების შემთხვევაში, იგი პირველი და ერთადერთი ტრანსგენდერი პარლამენტის წევრი იქნება არა მხოლოდ პოლონეთში, არამედ მთელს მსოფლიოში, რადგან ახალი ზელანდიის ყოფილ პარლამენტის წევრს, ტრანსგენდერ ჯორჯინა ბეიერს, 2007 წლის მერე ეს თანამდებობა აღარ უკავია.
გროდზკა აცხადებს, რომ მემარცხენეა და ყოველთვის სოციალ დემოკრატებს აძლევდა ხმას, სანამ ისინი მის იდეალებს პასუხობდნენ, თუმცა მორალური ღირებულებების სფეროში ამ პარტიამ ფიასკო განიცადა.
პალიკოტის მოძრაობამ, რომელსაც პროგრამაში პოლონეთში მოქმედი მკაცრი აბორტის საწინააღმდეგო კანონმდებლობის ლიბერალიზება, კონტრაცეპტივების მიმართ ხელმისაწვდომობა, მსუბუქი ნარკოტიკების ლეგალიზაცია და ერთსქესიანი ქორწინების დაკანონება აქვს შეტანილი, „ეგზით პოლების“ მიხედვით არჩევნებში 10,1% მოიპოვა, 1.5%–ის უზუსტობის გათვალისწინებით.
