31 მარტი ტრანსგენდერთა ხილვადობის საერთაშორისო დღეა. ეს თარიღი, პირველად, 2009 წელს აღინიშნა ამერიკის შეერთებულ შტატებში - 2009 წლის 31 მარტს, მიჩიგანში, პირველად ჩატარდა აქცია, რომლის მონაწილეებიც თავიანთი იდენტობის აღიარებასა და დაცვას მოითხოვდნენ. მესიჯი, რომლის გადმოცემაც აქტივისტებს ამ აქციით უნდოდათ, შემდეგნაირად ჟღერს: “ჩვენ ვამაყობთ იმით, რომ ვართ ტრანსგენდერი ადამიანები, ჩვენ ვიმსახურებთ სრულფასოვან ცხოვრებას და არ უნდა გვეშინოდეს ამის!”. უკვე მეშვიდე წელია, 31 მარტს ლგბტქ აქტივისტები საზოგადოების ყურადღებას ტრანსგენდერებისთვის მნიშვნელოვან საკითხებზე, პრობლემებსა და საჭიროებებზე მიაპყრობენ.

ტრანსგენდერთა ხილვადობის საერთაშორისო დღეს ლგბტ ორგანიზაციები: „ვისგი“, „თემიდა“, „ლგბტ საქართველო“  და "იდენტობას" ქუთაისის ოფისი სხვადასხვა სახის აქტივობებს გეგმავენ.

„ვისგი“ (ქალთა ინიციატივების მხარდამჭერი ჯგუფი) ტრანსგენდერთა ხილვადობის საერთაშორისო დღეს, საღამოს საათებში ვაკის პარკში აღნიშნავს, სადაც მსურველებს ფოსთქარდები, თემატური სტიკერები და ფლაერები დაურიგდებათ.

არასამთავრობო ორგანიზაციები "ლგბტქი ასოციაცია-თემიდასა" და "ლგბტ საქართველოს" ორგანიზებით ხვალ „ფრონტლაინ ჯორჯიაში“, ტრანსგენდერთა ხილვადობასთან დღესთან დაკავშირებული კონფერენცია გაიმართება, რომელიც 12:00 საათიდან 15:00 საათამდე გაგრძელდება. კონფერენციაზე მომხსენებლები ისეთ თემებზე ისაუბრებენ, როგორიცაა  ტრანსგენდერ ადამიანთა იურიდიული მდგომარეობა საქართველოში, ტრანზიციის პროცესის სამედიცინო საკითხები, ტრანს-ფემინიზმი და სხვ.

ტრანსგენდერთა საერთაშორისო დღეს აღნიშნავს ხვალ "ინდეტობას" ქუთაისის" ოფისიც, სადაც ფილმის "დანელი გოგონა" ჩვენება გაიმართება, რის შემდეგაც საქართველოში ტრანსგენდერი ადამიანების მდგომარეობაზე იმსჯელებენ და გარდაცვლილ ტრანსგენდერ ქალებს, საბი ბერიანს და ბიანკა შიგუროვას გაიხსენებენ.