კოლიბრი პატარა, მაგრამ ამაყი ტროპიკული ჩიტია, რომელიც სხვა ფრინველებისაგან იმით განსხვავდება, რომ დაბლა დაფრინავს და სიმღერა არ გამოსდის. რაც შეეხება პეტერბურგელ კოლიბრებს, ხალხში, ქალების ამ უჩვეულო კოლექტივის ბიოგრაფიის შესახებ ცნობები, ფაქტებზე მეტად, ლეგენდების სახით უფრო ვრცელდებოდა. კვარტეტის ინტერვიუებიც, როგორც წესი, აბსურდულად ჟღერდა, საიდანაც რთული იყო მათ შესახებ დასკვნების გამოტანა. ერთ დროს, Колибри-ზე ასეთი მითიც კი არსებობდა, რომ თითქოს ქალები, როკ-ჯგუფ Аквариум-ის წევრების ცოლები იყვნენ. ერთი რამ ცხადია: საბჭოთა კავშირის მასშტაბით, კოლიბრის მსგავსი პროექტი, სადაც შემოქმედებით პროცესს ქალები წარმართავდნენ და რომელიც ფემინურობის სრულიად ახალ პერსპექტივას სთავაზობდა მსმენელს, პირველი იყო. Колибри-ის უდიდეს დამსახურებად შეგვიძლია მივიჩნიოთ პოსტ-საბჭოთა პერიოდში, ქალი როკ მუსიკოსებისათვის გზის გაკვალვა.
1980-იანი წლები, საბჭოთა როკ მუსიკისათვის, აღორძინების ხანა აღმოჩნდა, ყოფილი ლენინგრადი კი მის ცენტრს წარმოადგენდა. სწორედ ლენინგრადის სკოლას ეკუთვნიან ჯგუფები: Кино, Аквариум და ДДТ. 1981 წელს, ლენინგრადის როკ კლუბის დაარსება გარდამტეხ მოვლენად იქცა, რამაც მოყვარულ მუსიკოსებს, პროფესიული ზრდისათვის ახალი პლატფორმა შესთავაზა. კოლიბრიც ამ დროს გამოჩნდა ასპარეზზე და არსებული გენდერული ასიმეტრიის მიუხედავად, ღირსეული ადგილი დაიმკვიდრა ბიჭების როკ კლუბში, სადაც მათი კონცერტები რეგულარულად იმართებოდა.
Колибри ფორმალურად ქალთა საერთაშორისო დღეს, 1988 წლის 8 მარტს დაარსდა. ჯგუფის შექმნის ინიციატივა ქარიზმატულ ნატალია პივოვაროვას ეკუთვნის, რომელიც პანტომიმის თეატრის მსახიობი გახლდათ და იმ პერიოდში, ჯამბაზობისთვის ემზადებოდა. ეს იდეა პივოვაროვას მორიგი ბოჰემური თავყრილობისას დაებადა, სადაც მისი და ელენა იუდანოვას ქმრები, განცალკევებით სვამდნენ და ერთობოდნენ, ქალებს კი მათთან ყოფნა მოსაწყენად ეჩვენებოდათ, ამიტომაც, სამზარეულოში, თავისთვის ატარებდნენ დროს და, შიგადაშიგ, ჭურჭელსაც რეცხავდნენ. ერთ საღამოს, პივოვაროვამ, ელენა იუდანოვას, რომელიც სიმღერის ნიჭით იყო დაჯილდოებული, თუმცა იმ პერიოდისათვის თეატრის მხატვრად მუშაობდა, ქალების კოლექტივის დაარსების სურვილი გაანდო, რომელიც მათ თვითგამოხატვისა და არტისტული ნიჭის გამოვლენის შესაძლებლობას მისცემდა. საწყის ეტაპზე, მუსიკალური ჯგუფის შექმნა არ წარმოადგენდა ჩანაფიქრის ნაწილს.
თითქმის ერთი წლის განმავლობაში, კოლექტივი უბრალოდ იმ გოგონების გაერთიანება იყო, რომლებიც ლენინგრადის ბოჰემური წრის რიგებში ეწერებოდნენ. თითქმის არც ერთი მათგანი ფლობდა რომელიმე ინსტრუმენტს და ტროპიკული ფრინველის მსგავსად, არც სიმღერა გამოსდიოდათ. საბოლოოდ, პივოვაროვამ ექვს ქალს შესთავაზა მუსიკალური თეატრის მსგავსი გაერთიანების ჩამოყალიბება და ქავერების შესრულება კაბარესა და ავანგარდული მუსიკის სტილში. რადგანაც პივოვაროვა ჯამბაზი იყო, გადაწყდა, რომ ჯგუფის გამოსვლები კოსტიუმირებული იქნებოდა. კრიტიკოსების თქმით, ლენინგრადის როკ კლუბში შემდგარმა დებიუტმა ფურორი მოახდინა და სულ რაღაც ერთ ღამეში, სექსტეტი, ქალაქის კულტურული ცხოვრების სენსაციად იქცა. მალე ჯგუფის წევრებმა სიმღერის სწავლა მოახერხეს. თუ კი თავდაპირველად, კოლიბრი 60-იანი წლების კომპოზიციების ქავერებით შემოიფარგლებოდა, ჯგუფის შემოქმედებაში ის გარდამტეხი მომენტი დადგა, როდესაც გადაწყვიტეს, რომ საკუთარი ნამუშევრების შექმნას დაიწყებდნენ.
შეუძლებელია კოლიბრის მუსიკის ერთ რომელიმე ჟანრობრივ კატეგორიაში მოქცევა. ჯგუფის ჟღერადობა პოსტ-პანკის, კაბარესა და რუსული შანსონის ელემენტებს მოიცავს, ხოლო შემოქმედება კი დეკადენტურობით, ექსტრავაგანტულობით, რომანტიკულობითა და ნაივურობით გამოირჩევა. როგორც პივოვაროვამ აღნიშნა, შთაგონების წყარო მშობლების საყვარელი, 50-იანი და 60-იანი წლების მუსიკიდან მიიღო, სადაც სიმღერებს მეტი გულუბრყვილობა და სისუფთავე ახასიათდებდათ. კოლიბრის სასიმღერო თემატიკა სიყვარულისა და ქალური საიდუმლოებების გარშემო ტრიალებს. მათი სასცენო სამოსი ბალეტის იდენტურ, შავ კაბებს, ბებიების ქუსლიან ფეხსაცმელებსა და ფერად ხელთათმანებს წარმოადგენდა.
1990 წლისათვის, კოლიბრის შემადგენლობაში ხუთი ქალი შედიოდა: ნატაშა პივოვაროვა, ელენა იუდანოვა, ინა ვოლკოვა, ოლგა ფეშენკო და ირინა შაროვატოვა. სადებიუტო ალბომი სახელწოდებით Манера поведения (ყოფაქცევის მანერა) 1991 წელს გამოიცა. მისი ჩაწერის პროცესში, ინსტრუმენტული პარტიების შესასრულებლად, ცნობილი პეტერბურგელი მუსიკოსები, მათ შორის როკ-ჯგუფების Телевизор და Аквариум წევრები მონაწილეობდნენ. მას შემდეგ, რაც კრებულმა დღის სინათლე იხილა, კოლიბრიმ კიდევ უფრო აქტიურად დაიწყო კონცერტებზე გამოსვლა, ჯერ ქვეყნის ფარგლებში, მოგვიანებით კი მის ფარგლებს გარეთაც. ნატაშა პივოვაროვას თქმით, თაყვანისმცემლები ყვავილების ნაცვლად, ხშირად შამპანიურებს უგზავნიდნენ, რამაც მისი ალკოჰოლზე დამოკიდებულება გამოიწვია. კოლიბრის პირველი კონცერტი საზღვარგარეთ, 1991 წელს, შედგა საფრანგეთში, ქალაქ ნანტში გამართულ ფესტივალზე - Les Allumees. ამავე წელს, ჯგუფი, პივოვაროვას სიტყვებით ერთ-ერთმა პრინცესამ, კერძოდ ოლგა ფეშენკომ დატოვა.
კოლიბრის მეორე ალბომი Маленькие трагедии (პატარა ტრაგედიები) 1992 წელს გამოდის. 1994 წელს კი ბენდის სიმღერებმა უკვე რადიოშიც გაიჟღერა, რაც ჯგუფის პოპულარობის წინაპირობა გახდა. ამავე ალბომს ეკუთვნის კოლიბრის სავიზიტო ბარათი - Желтый лист осенний (შემოდგომის ყვითელი ფოთოლი). ირონიულია, რომ Желтый лист осенний, რომელიც ისევე როგორც კოლიბრის ნამუშევრების უმრავლესობა, ელენა იუდანოვას მიერაა დაწერილი და პოპულარული სიმღერების პაროდიას წარმოადგენს, თავად იქცა ჯგუფის კომერციულად ყველაზე წარმატებულ კომპოზიციად. სიმღერაში ფრაზას "платье не по росту, нету красоты, на меня такую не посмотришь ты" (კაბა ჩემი ზომის არაა, არც ლამაზი ვარ, ასეთს ზედ არ შემომხედავ) ვხვდებით, რომელიც კოლიბრის თვით-ირონიულობისა და ირონიულობის თვალსაჩინო მაგალითია. თუმცა, სინამდვილეში, მსმენელისთვის, მარტივი არასდროს ყოფილა იმის გარჩევა, თუ სად გადიოდა კოლიბრისათვის ზღვარი თამაშსა და სერიოზულობას შორის.
იმის მიუხედავად, რომ კომპოზიციების უმრავლესობა ელენა იუდანოვას ეკუთვნის, უნდა ითქვას, რომ ჯგუფის იდეოლოგიური ლიდერი, ყოველთვის ნატაშა პივოვაროვა იყო. ამავე კრებულში შესული რომანსი Женские штучки, დღემდე გაისმის ფილმებსა და გადაცემებში. Провал (მარცხი) კი, სათაურის მიუხედავად, კოლიბრის ერთ-ერთი ყველაზე ოპტიმისტური სიმღერაა, რომელიც გაზაფხულის მოლოდინის მდგომარეობას აღწერს. აღსანიშნავია, რომ სასოწარკვეთილ მდგომარეობაში მყოფი არა ერთი თაყვანისმცემელი ჯგუფს, სწორედ ამ სიმღერის შექმნისათვის ემადლიერებოდა, რომელიც მათთვის, 90-იანი წლების წყვდიადში, ხელჩასაჭიდი და იმედისმომცემი აღმოჩნდა.
1994 წელს, გამოდის კოლიბრის მესამე ალბომი Найди 10 отличий (იპოვეთ 10 განსხვავება). კრებულის სახელწოდების წინაპირობა, მასში შესული 10 კომპოზიცია აღმოჩნდა, რომლებიც ძალიან განსხვავდებოდნენ ერთმანეთისაგან. შეიძლება ითქვას, რომ Негр в автобусе (შავკანიანი ავტობუსში), ჩანაწერში შესული ყველაზე გამორჩეული ტრეკია.
1996 წლის შემოდგომას, პრინცესები მეოთხე სტუდიური ალბომის ჩაწერას, სახელწოდებით - Бес Сахара (შაქრის გარეშე/შაქრის ეშმაკი) იწყებენ. ჩანაწერზე, მათთან ერთად, ჯგუფი Tequilajazzz და ДДТ- ს წევრი - კონსტანტინ შუმაილოვი მუშაობდნენ. 1997 წელს, ალბომის გამოცემის შემდეგ, კოლიბრის პირველად ეძლევა შესაძლებლობა, მსმენელის წინაშე, ფონოგრამის გარეშე, ცოცხლად იმღეროს. კრებულში შესულ კომპოზიციაზე - А я? ( და მე?) კი, ჯგუფის წევრის - ინა ვოლკოვას მეუღლემ, რეჟისორმა ალექსანდრ ბაშიროვმა, ვიდეო კლიპი გადაიღო.
1998 წელს, კოლიბრის სულისჩამდგმელი და იდეოლოგიური ლიდერი - ნატაშა პივოვაროვა, თეატრალური და მუსიკალური სოლო კარიერის გაგრძელების მიზნით, ბუდეს ტოვებს. პივოვაროვა ჯგუფის Молочный шейк პროდიუსერი ხდება, რომელსაც ზოგიერთი კრიტიკოსი "თინეიჯერების კოლიბრის" უწოდებდა. 2000 წლის იანვარში კი ის ახალ ბენდს, სახელწოდებით Соус აარსებს. ნატაშა პივოვაროვა, 2007 წლის 24 სექტემბერს, ყირიმში მომხდარ ავტოკატასტროფაში ტრაგიკულად დაიღუპა.
კოლიბრის მამოძრავებელი ძალა, სწორედ ექსცენტრიული დივა - ნატაშა პივოვაროვა იყო. თუმცა, მისი ჯგუფიდან წასვლის შემდეგ, ტრიომ მაინც განაგრძო არსებობა. მალე მათ ორი ახალი წევრი: ოლეგ ემიროვი და ანდრეი გრანოვიჩი შეემატათ. ისინი კონცერტების დროს, ინსტრუმენტულ პარტიებს ასრულებდნენ, ხოლო შემოქმედებით პროცესზე პასუხისმგებელნი, კვლავ ქალები რჩებოდნენ.
2013 წელს, ინა ვოლკოვამ განაცხადა, რომ კოლიბრი წყვეტდა მოღვაწეობას. 6 წლიანი დუმილი, მოულოდნელად, 2019 წლის დეკემბერს დაირღვა, როდესაც ჯგუფის წევრებმა, მსმენელს გაუმხილეს, რომ ახალ ჩანაწერებზე მუშაობდნენ, თუმცა ალბომის დასასრულებლად, ფინანსური მხარდაჭერა სჭირდებოდათ. თანხა სწრაფად შეგროვდა, და როგორც ცნობილი გახდა, ჯგუფი, რომლის წევრებსაც დღესდღეობით ელენა იუდანოვა, ინა ვოლკოვა და ირინა შაროვატოვა წარმოადგენენ, ერთის ნაცვლად, ორ ალბომს გამოუშვებენ.
მათი თქმით, ნამუშევარში ყურადღება ოქროს, ცას, ყვავილებს, ტელევიზორს, სისხლს, უცხოელებს, ბიჭებს, ქალებს, გოგონებს და ერთ უცნობი ჯიშის ძაღლსაც დაეთმობა. ჩანაწერის გამოსვლა 2020 წლის ნოემბრისათვის იგეგმებოდა, თუმცა ჯერჯერობით, მხოლოდ ახალი სინგლის - Молодая (ახალგაზრდა ქალი) მოსმენა არის შესაძლებელი. როგორც ცნობილია, Колибри ახალ ალბომშიც არ ღალატობს საკუთარ თავს და სიყვარულის, სიკვდილის, ქალური საიდუმლოებებისა და რაც მთავარია, გადაფრენის შესახებ გვპირდება კომპოზიციებს.
