პოლიციამ დიდი რაოდენობით ცრემლსადენი აირი გამოიყენა პრაიდის მოწინააღმდეგეთა დასაშლელად. სამი სახანძრო მანქანა აღმოჩნდა საჭირო სერბეთის პრეზიდენტის ბორის ტადიჩის დემოკრატიული პარტიის შტაბში გაჩენილი ხანძრის ჩასაქრობად, რომლის გამომწვევი მიზეზიც აქციის მონაწილეთა მიერ უხვად გამოყენებული ”მოლოტოვის კოკტეილი” გახლდათ.
საერთო ჯამში, შეტაკებისას 85 პოლიციელი და 12-ზე მეტი სამოქალაქო პირი დაშავდა. ამასთან ერთად შინაგან საქმეთა სამინისტროს წარმომადგენლის სუზანა ვასილიევიჩის განცხადებით დაკავებულ იქნა აქციის 60 მონაწილე.
გეი აქტივისტები პრაიდის ჩატარებას წელს აპირებდნენ, მას მერე რაც ერთი წლის წინ მათი გეგმები ჩაიშალა. მიზეზი ის გახლდათ, რომ პოლიცია პრაიდის მონაწილეებს უსაფრთხოების გარანტიას ვერ აძლევდა. წელს ეს ღონისძიება, ევროკავშირში ინტეგრაციისკენ მიმართულ სერბეთში, ტოლერანტობის მორიგი გამოცდა უნდა ყოფილიყო.
ძალადობის ტალღა თავად პრაიდის მონაწილეებს არ შეხებია. მსვლელობა ბელგრადის ცენტრში, ინციდენტების გარეშე დასრულდა, რადგან პოლიცია საპროტესტო აქციის მონაწილეებს ქალაქის სხვა ნაწილში აკავებდა.
2000 ადამიანზე მეტი გამოვიდა ბელგრადის ქუჩებში პრაიდის გასაპროტესტებლად და ”ოჯახური ღირებულებების პატივისცემისკენ” მოწოდებით. სერბეთის მოსახლეობის 50%-ზე მეტი, სერბეთის მართლმადიდებლურ ეკლესიასთან ერთად ეწინააღმდეგება სექსუალური და გენდერული იდენტობის საჯარო გამოხატვას.
