2016 წლის 24 მაისს ვიქტორია ავსტრალიის მეორე შტატი გახდება, რომელიც 1981 წლამდე მოქმედი ჰომოსექსუალური კავშირების ამკრძალავი კანონმდებლობის გამო ბოდიშს მოიხდის. ვიქტორიის შტატის პრემიერ-მინისტრმა დაადასტურა, რომ შტატის მთავრობა ოფიციალურად ბოდშის მოხდას მელბურნის პრაიდის მიმდინარეობისას გეგმავს.

დენიელ ენდრიუსის თქმით, ბოდიშის მოხდა იქნება ძლიერი მესიჯი იმის შესახებ, რომ ქვეყანაში წუხან წარსულში დაწესებული დისკრიმინაციული კანონების გამო.

"ეს შავი ლაქაა ჩვენი ქვეყნის ისტორიის ფურცლებზე. ბოდიშის მოხდა იქნება დასტური იმისა, რომ ახლა უკეთესები ვართ. სამარცხვინოა, რომ ჩვენი კანონები კრძალავდა და სჯიდა ჰომოსექსუალურ კავშირებს, როგორც კრიმინალურ ფაქტს," - განაცხადა ვიქტორიის შტატის პირველმა პირმა.

ავსტრალიის ექვსი შტატიდან ოთხში: ტასმანიაში, ვიქტორიაში, სამხრეთ ავსტრალიასა და სამხრეთ უელსში ჰომოსექსუალობაში ეჭვმიტანილთა, ბრალდებულთა და სასჯელმისჯილთა შესახებ არსებული კრიმინალური ჩანაწერების განადგურების გადაწყვეტილება უკვე მიღებულია.

ავსტრალიის კონსტიტუციურ მონარქიაში დედაქალაქის ტერიტორია პირველი ტერიტორიული ერთეული იყო, რომელმაც ჰომოსექსუალობის დეკრიმინალიზაცია 1973 წელს მოახდნა. ბოლო შტატი კი ტასმანია იყო, სადაც ჰომოსექსუალობის გამო ადამიანები 1997 წლამდე ისჯებოდნენ. აწ-უკვე გაუქმებული კანონის მიხედვით, გეი სექსისთვის დაწესებული სასჯელი რიგ შეთხვევებში 21 წლიან პატიმრობას აღემატებოდა.